ALLAHI ZİKR ETMƏK

Allahı ﷻ zikr etmək insana çox zövq verən, həm də çox asan bir ibadətdir. İnsan çox az səy göstərməklə bu əməli edə bilər. Allahı zikr etməyin fəziləti və faydaları sayıla bilməyəcək qədər çoxdur.

Quran-i Kərimdən Dəlil

Allah ﷻ Qurani-Kərimin müxtəlif yerlərində zikri əmr etmişdir. O ayələrdən biri də budur:

“Ey iman gətirənlər, Allahı ﷻ çox zikr edin!”

(Əhzab, 41)

Zikrin İnsan Üçün Faydaları

Bu bir həqiqətdir ki, zikr etməyin Allaha ﷻ heç bir faydası yox­dur, çünki O, qulların zikrinə möhtac deyildir, ancaq qullar zik­rə möhtacdır. Zikr sayəsində:

1. Allah ﷻ ilə olan bağlar güclənir.
2. İnsa­nın ruhu mənəvi bir qida alır.
3. İnsanda böyük bir həvəs və qüvvət meydana gəlir.
4. Bu ruhani qüvvətlə insan şeytana və nəfsinə qarşı daha rahat mübarizə aparır.
5. Günahlardan çəkinməsi asanlaşır.
6. Hər zikr edildikdə əməl dəftəri yaxşılıqlarla zənginləşir.

Peyğəmbərimizdən (ﷺ) Hədislər

Bir səhabə Peyğəmbərdən ﷺ soruşdu: “Allah ﷻ qatında ən fəzilətli, qi­ya­mət günü ən uca olan ibadət hansıdır?” Əfən­dimiz ﷺ buyurdu:

“Allahı ﷻ zikr etməkdir!”

(Camiül-Üsul)

Başqa bir səhabə Peyğəmbərə ﷺ dedi: “Ey Allahın Rəsulu! Yaxşı­lıqların müxtəlif növü var. Mənim bunların hamısını etməyə gü­cüm çatmır. Mənə elə bir şey öyrət ki, mən onu yaxşıca mühafizə edə bilim. Mənə əlavə şeylər söyləmə, çünki mən unut­qanam”. Peyğəmbər ﷺ buyurdu:

“Sənin dilin hər zaman Allahın zikri ilə islansın.”

(Sünəni-Tirmizi)

Hz. Əbu Musa əl-Əşəri (r.a) Peyğəmbərin ﷺ belə buyurduğunu rəvayət edir:

“İçində Allahın ﷻ adı zikr edilən evlə içində Allahın adı zikr edilməyən ev arasında fərq ölüylə dirinin fərqi kimidir (Yəni içində zikr edilən ev diri, digəri isə ölüdür).”

(Səhihi-Buxari)

Başqa bir hədisdə Rəsulüllah ﷺ belə buyurur:

“Bir məclisdən Allahın ﷻ adını zikr etmədən qalxan kimsələr sanki ölü eşşək üzərindən qalxmışdır. Bu məclis qiyamət günü onların həsrətinə səbəb olacaqdır.”

(Sünəni-Əbu Davud)

Məclisin Sonunda Oxunan Dua

Rəsulüllah ﷺ bir hədisdə belə buyurmuşdur: “Bir məclisin sonunda bu dua oxunarsa, o məclis üçün kəffarə olar”.

سُبْحَانَكَ اللّٰهُمَّ وَبِحَمْدِكَ لَا اِلٰهَ اِلَّا اَنْتَ اَسْتَغْفِرُكَ وَاَتُوبُ اِلَيْكَ

“Allahım! Sənə həmd edər və nöqsan sifətlərdən tənzih edi­rəm, Səndən başqa ibadətə layiq haqq məbud yoxdur, Səndən bağışlanma istəyirəm və Sənə tövbə edirəm.”

(Sünəni-Nəsai)

Zikr Etməyin Asanlığı və Şərtləri

Allah ﷻ zikri o qədər asanlaşdırmışdır ki, heç bir şərtə bağlı qoy­mamışdır. Zikr ibadəti yeriyərkən, otu­rarkən, qalxarkən, iş görərkən edilə bilər. Bunun üçün dəstəmazlı olmaq da şərt deyil, hətta heyz və cənabət halındaykən də zikr etmək caizdir.

Diqqət: Çılpaq və ya ayaqyolu kimi nəcasət olan yerlərdə dil ilə zikr etməmək, yalnız qəlb ilə zikr etmək lazımdır.

Tövsiyə Edilən Kitablar

Xüsusi zikrlər üçün aşağıdakı kitabları mütaliə edə bilərsiniz:

1. Fəzailüz-Zikr (Zikrin Fəzilətləri): Yazar: Şeyxülhədis Möv­lana Zəkəriyyə Kəndəhləvi (r.a)
2. Zikrüllah: Yazar: Mövlana Müfti Muhəmməd Şəfi (r.a)
3. Mamülətül-Yəvmiyyə: Yazar: Dr. Ab­dulhaqq Arifi (r.a)

Qısa və Fəzilətli Zikrlər

Aşağıda bir neçə qısa zikr yazılmışdır. Hər bir halda onları di­limizdən düşürməyək.

1. Rəsulüllah ﷺ buyurdu: “Bu iki söz Rəhmana çox sevimlidir. On­ları dilə gətirmək çox asandır, amma mizanda çox ağır gələ­cəkdir”. (Səhihi-Buxari)

سُبْحَانَ اللَّهِ وَبِحَمْدِهِ، سُبْحَانَ اللَّهِ العَظِيمِ

2. Bir hədisdə belə keçir: “Bu sözləri çoxca söyləyin, çünki bu sözlər cənnət xəzinələrindən bir xəzinədir”. (Mişkat)

لَا حَوْلَ وَلَا قُوَّةَ إِلَّا بِاللهِ

3. Bir hədisdə belə buyurulur: “Hər kim səhər açılanda bu sözləri on dəfə oxuyarsa, İsmayılın (ə.s) övladlarından on kölə azad etmiş kimi savab qazanar. Ona on savab yazılar, on günahı silinər, on dərəcə yüksələr və axşama qədər şeytanın şərrindən qorunar. Kim bu sözləri axşam oxuyarsa, sabaha qədər bu faydaları əldə edər”. (Sünəni-Əbu Davud)

لَا اِلٰهَ اِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ